Багъалы окъуучула!

Жангы окъуу жылда сиз туугъан жерибизни, адет-тёрелерибизни юслеринден, халкъны маданиятыны, тарыхыны юсюнден кёбюрек билликсиз. табийгъатыбызны ариулугъу, байлыгъы назмулада, хапарлада, халкъ чыгъармалада къалай суратланнганын кёрлюксюз.

Грамматикада уллу эс бу классда къош айтымлагъа бурулады. тенг жарашхан эм бойсуннган къош айтымланы битеу тюрлюлери бла шагъырей боллукъсуз, аллай айтымланы къураргъа, хайырланыргъа да юйренириксиз.

Билесиз, къайсы тил да кёп тёлюлени къыйыны бла къурала, айный, сакълана келеди. Хар адам да жер башына бир миллетни адамы болуп тууады. аны адамлыкъ борчларындан бири – кесини халкъыны тилин, адет-тёрелерин билиргеди, ол тилде ёмюрлени ичинде къуралгъан, жаратылгъан ниет байлыкъны кесине алыуду, ызындан тёлюлеге ётдюрюудю. «Биз ол борчну къалай толтурабыз?» – деп сорургъа керекбиз кесибизден.

айтхылыкъ къыргъызлы жазыучу, къайсынны керти тенги чингиз айтматов: «Халкъны ёлюмсюзлюгю – аны тилиндеди», – дегенди.

ата журтха керти сюймеклик ана тилге сюймекликден башланады. ана тилине не кёзден къарагъаны адамны культурасын, адамлыгъын да билдиредиле.

Багъалы сабийле! ана тилни магъанасын ангылап, аны иги билирге итинигиз! адам этерге сюйсе, ол этмезлик, эталмазлыкъ зат жокъду.