Багъалы окъуучула!

Сиз ана тилигизни быйыл жетинчи жыл окъурукъсуз. Кёп затха юйреннгенсиз, алай малкъар тилни бай дуниясын битеу билип къояргъа онг жокъду, аны себепли билим жо- лоучулукъгъа чыгъарыкъсыз.

Бу дерслик сизге тил бла байламлы кеси аллыгъызгъа жангы билимле ачаргъа, ол билимигизни тюрлю-тюрлю окъуу эм жашау болумлада хайырлана билирге, таматала эм кесигиз тенглиле бла кенгеширге, ана тилигизни ангыларгъа, багъаларгъа эм сакъларгъа юйретирикди.

Малкъар тилни иги билсегиз, кёп миллетлени тиллерин къыйналмай ангыларыкъсыз. Бизни тилибиз къаллай бай, ариу болгъанын биле барлыкъсыз.

Сёлешгенде, жазгъанда да ана тилибизни жорукъларын бузмазгъа, толу магъаналы айтымла къураргъа тил билимни, быйыл сиз окъурукъ, морфология бёлюмю себеплик этерикди. Ол сизге малкъар тилни грамматика жашырынларын ачарыкъды. Ата журтубузну, туугъан жерибизни, адепкъылыкъны, саулукъну, табийгъатны юслеринден байламлы хапарла къураргъа юйретирикди.

Устаз айтхан жумушланы тынгылы тамамлагъыз, кёл салып окъугъуз. Не аз да онгугъуз болгъанда, кеси тилигизде сёлешигиз. Грамматика жорукъланы текстле бла бирге юйренигиз, сёлешиу тилде терк-терк хайырланылгъан сёзлени, сёз тутушланы кёлден билсегиз, ала бла практикада хайырланыргъа юйренсегиз, тилни билиуде жетишимлери- гиз бийик боллукъдула. Заманыгъызны зыраф иймегиз, билимли болургъа итинигиз. «Билген айып тюйюлдю, билирге сюймеген айыпды», – дейдиле, билим алыргъа сюйгенледен болугъуз, багъалы окъуучула!