Багъалы окъуучула!

Жангы окъуу жыл бла, Билимни байрамы бла алгъышлайбыз! Сиз, малкъар тилни беш жыл окъуп, алтынчы классха ётгенсиз. Ол заманны ичине школ жашауну, кесигизни эм юйюрюгюзню, адеп-къылыкъны, ишни, спортну, туугъан жеригизни, жылны кезиулерини юсюнден байламлы текстлени орус тилге кёчюрюрге, аланы магъаналарын кеси сёзлеригиз бла айта билирге, окъулгъан материал бла байламлы аудио- текстлеге тынгыларгъа, аланы магъаналарын ангыларгъа юйреннгенсиз.

Сиз билген сёзлеригизни тематика къауумлагъа жыйышдыра, ала бла сёлешиу эм жазыу тилде хайырлана, сёзлени морфемалагъа юлеше, аланы фонетика эм къурам жаны бла тинте билесиз. Алай билимни чеги болмагъаны себепли, малкъар тилни тамашалыкъ дуниясында жолоучулукъну сюйюп бардырлыкъсыз деп ышанабыз.

Алтынчы классда сиз билимигизни андан ары ёсдюрлюксюз, халатсыз жазаргъа юйренириксиз, байламлы тилигизни айнытырыкъсыз.

Бу китапда берилген грамматика жорукъла сизге тюрлю – тюрлю затланы юсюнден хапарла билирге, тилни теренирек ангыларгъа болушурукъдула.

Программаны излемлерине кёре, сиз школ жашауугъузну, кесигизни, юйюрюгюзню, тенглеригизни, Къабарты – Малкъарны белгили адамларыны юсюнден хапар айтыргъа, нёгеригиз бла ана тилигизде ушакъ этерге, туугъан жеригизни, Ата журтугъузну табийгъатын суратларгъа, саулукълу, адепли болургъа юйретген жорукълагъа, нарт сёзлени магъаналарын ачыкъларгъа, проект ишле толтурургъа дагъыда кёп тюрлю – тюрлю затлагъа юйренириксиз.

Бу дерслик сизни ана тилигизни сюерге юйретир деп ышанабыз. «Окъугъан акъыл окъуйду» дейдиле. Окъугъуз, билим алыгъыз, хар затны билирге сюйгенледен болугъуз! Билимни жолоучулугъунда жетишимлеригиз бийик болсунла!