Багъалы сохтала! Бу китап малкъар адабиятыны тарыхы бла, аны аламат чыгъармалары бла да сизни бютюнда терен ша гъырей этерикди. Толусунлай болмаса да, тёбен класслада сиз малкъар халкъны кёлден чыгъармачылыгъы бла танышхан-сыз. Ол бизни бюгюннгю адабиятыбызны от жагъасыды. Андан сора да, сиз талай жазыучубузну бир-бир чыгъармаларын да окъугъансыз. Аладан кёп зат да алгъан болурсуз.


Окъугъанындан хыйсап эте билгеннге китап – уллу саугъады. «Билмеген бла туумагъан – бир кибик» деген нарт сёзю-бюз эсигизде болур. Билимли болур ючюн а, окъургъа керекди. Бош алай да угъай, кёл салып, сагъыш этип. Акъылынг да, билиминг да бирге келиширча, бир болурча! «Акъыл – башха, окъуу – башха» деп айтылмазча. «Окъууну акъыл озду, акъыл ны окъуу озду» демезча. Окъууунг (билиминг) бла, акъылынг бла да кесинге, халкъгъа да игилик этерча.

Бу китапны юсю бла сиз адабият чыгъармаланы тинтирге, аланы ниет-эстетика кючлерин кёрюрге юйренириксиз. Хар кимни да, чыгъарманы окъугъандан сора, кесини бир оюму тууады, хар жигитге да кесича багъа бичеди. Ол оюмла устаз айтхан бла келиширге-келишмезге да боладыла. Хар адам кеси башха болгъаныча, оюму, дуниягъа кёз къарамы да башхады. Аны себепли, айтханым терсми-тюзмю болур, устаз не айтыр деп къарамай, кеси оюмугъузну къоруулай, аны алай нек болгъанын ангылата билирге керексиз.

Китабыгъызгъа сайланнган чыгъармаланы жаланда ма ол тукъум окъуп чыгъыу изленеди сизден.

Алайды да, огъурлу кюнде башлагъыз!